හනික වරෙව් කොල්ලනේ/කෙල්ලනේ... මෙන්න මෙහෙ වරෙව්....

හැමදාම මතක් කරන විදියට අවුරුදු පහක් තිස්සේ සිංහල භාෂාවෙන් බ්ලොග් ලියන කියවන අයගේ නවාතැන වෙච්ච අන්තර්ජාලයෙන් ඔබ්බට ගිය වින්දනීය සහෝදරත්වය - බ්ලොග් අවකාශයේ මිතුරෝ හය වැනි අවුරුද්දටත් පිවිසෙන්නයි සූදානම් වෙන්නෙ. අළුතින් බ්ලොග් ලෝකයට එකතු වෙන සහෝදර සහෝදරියන් එහෙම ඉන්නවනං බලයි මේ මොකක්ද කියලා. අපි කලින් අවුරුදු වල කරපු දේවල් මොනවද කියල දකුණු අත පැත්තෙ තියෙන පරණ බ්ලොග් පෝස්ට් කියෙව්වාම දැන කියාගන්න පුළුවන්. 

මේ හැම කටයුත්තක්ම සිද්ධ කරන්නේ 2011 අවුරුද්දෙ ඉඳල හැම අවුරුද්දකම බ්ලොග් අවකාශයේ මිතුරෝ සංවිධායක මණ්ඩලයට ස්වේච්ඡාවෙන් ඉදිරිපත් වෙන සහෝදර සහෝදරියන්ගේ දාඩිය මහන්සියෙන්. ඉතිං මේ අවුරුද්දෙත් සංවිධායක මණ්ඩලයට එකතු පාදා වෙලා තමන්ගේ ශ්‍ර‍මය දායක කරන ගමන් තමන්ගෙ ජීවිතයට අළුත් අත්දැකීම් සහ කුසලතා ගොන්නක් එකතු කරගන්න කැමති නම් මේ අවස්ථාව ඔබට.
හැබැයි එකක්... මේ අවුරුද්දෙ අපි බ්ලොග්කරුවන්ට විතරක් බ්ලොග් අවකාශයේ මිතුරෝ වැඩසටහන් සීමා කරන්න බලාපොරොත්තු වෙන්නෙ නෑ. බ්ලොග් ලියන්නෙ කියවන්නෙ නැති වුනත් ෆේස්බුක් ගෘෘප්, පේජ් වල සාමාජිකයන් සහ ඇඩ්මින්වරුන්ටත් මේ අවුරුද්දේ බ්ලොග් අවකාශයේ මිතුරෝ විවෘතයි.

කරන්න තියෙන්නෙ අපි පහුගිය කාලෙ කරපු කියපු දේවල් බලල, අපේ ව්‍යවස්ථාව, මූල්‍ය ප්‍ර‍කාශන එහෙම කියවලා අළුත් අවුරුද්දේ මේ වැඩේ කරගෙන යන්න තමන් සූදානම් කියල හිතෙනවනං පහළ තියෙන ෆෝම් එක පුරවන එක විතරයි. ඊට පස්සෙ අපි නොවැම්බර් පළවෙනිදා උදේ 10.00 ට විතර කොළඹදි හමුවෙලා ඉස්සරහට කරන්න ඕන දේවල් තීරණය කරමු.
විශේෂයෙන්ම අළුතින් බ්ලොග්කරණයට පිවිසුන නංගිල මල්ලිල ඉන්නවනං එයාලටත් පුළුවන් සංවිධායක මණ්ඩලයට එකතු වෙන්න. හැබැයි මේ වැඩේ වගකීමෙන් කරන්න පුළුවන් කියල හොඳ ආත්ම විශ්වාසයක් තියෙන අය විතරයි. ඔයාලට අවශ්‍ය සහයෝගය, මගපෙන්වීම දෙන්න අත්දැකීම් තියෙන පහුගිය අවුරුදු වල මේ කටයුතු සංවිධානය කරපු බොහෝ දෙනෙක් සූදානමින් ඉන්නවා. ඒ නිසා බය නැතුව වැඩේට බහිමු.

හැමෝටම හැම දේම කරන්න බැරිවෙයි. අපි පුළුවන් විදියට වැඩ බෙදාගෙන කරමු. තමන් භාරගන්න වැඩේ හරියට කරල 2015/2016 අවුරුද්ද බ්ලොග් අවකාශයේ ස්වර්ණමය අවුරුද්ද කරන්න පුළුවන් කොල්ලො කෙල්ලො ටිකක් මේ වැඩේට එකතුවෙයි කියල බ්ලොග් අවකාශයේ මිතුරෝ බලාපොරොත්තු වෙනවා.
එහෙනං අළුත් අවුරුද්දෙ අළුත් වැඩක් කරමු....